Ձեր վստահելի աղբյուրը

 «Փակ շուկայի»` պետական մարմինների կողմից անտարբերության մատնված հարցը «լուծումներ» է գտնում ինքն իրեն` «տերը» պատրաստվում է բացել այն, իսկ մտահոգ քաղաքացիները ստեղծում են շարժում` «Ազատագրենք հուշարձանն օլիգարխից»:

Ինչ են մտածում այս մասին նրանք, ում անունները չենք տեսնում ցուցակում, բայց գիտենք, որ սրտացավ են Փակ շուկայի ու մյուս մշակութային կոթողների «արդիականացմամբ»: 

Ճարտարապետ Արսեն Կարապետյան. «Ես պետք է ներողություն խնդրեմ, բայց չեմ կարող անկեղծ չլինել այս կարեւոր հարցում: Սկզբունքորեն համաձայն չեմ հարցի դրվածքի հետ, թե պիտի պայքարել Փակ շուկայի այժմյան տիրոջ դեմ: Անձամբ ինձ շատ քիչ են հետաքրքրում օլիգարխները ու բացարձակ կարեւոր չէ, թե ով է տերը եւ անձամբ փչացնողը:

Կարեւորը այն է, որ կան պետական մարմիններ, որոնք պարտավոր են ապահովել օրենքով հայտարարված ժառանգության պահպանումը, այդ թվում` պարտավոր էին կնքել պահպանության պայմանագիր սեփականատիրոջ հետ, ու քանի դեռ այդ փաստաթուղթը չկար, տիրոջից անիմաստ է պահանջել, ինքը հեչ պարտավոր չէ իմանալ, թե ինչ կարելի էր անել, ինչը՝ չէ: Նույնն էլ վերաբերվում է անօրինական շինարարությանը, բոլորը իրավունք ունեն ինչ ուզեն որտեղ ուզեն կառուցել, եթե դա արգելված չէ, իսկ այդ գործընթացին պետք է հետեւեն պատկան մարմինները, որոնք եւ հարկը եղած դեպքում ՊԱՐՏԱՎՈՐ են ձեռնարկել միջոցներ:

Եթե մենք բոլոր դեպքերում ընկնենք սեփականատերերի հետեւից, մենք երբեք չենք հասնի հաջողության, ինչպես մինչեւ հիմա չենք հասել (մաքսիմում կարող ենք ակնկալել «սիրուն չի» տարբերակը):

Միակ ճանապարհը պետական մարմինների հետեւողական հետապնդումն է, իմ կարծիքով միակ լուծումը հետեւողական պահանջն է պատժել.
- քաղաքապետին
- գլխավոր ճարտարապետին
- քաղաքաշինության նախարարին
- մշակույթի նախարարին
- վերահսկիչ մարմիններին

Այդ նպատակով պետք է գտնել գումար եւ վարձել փաստաբաններ, դատական գործ հարուցել. «Երեւանցիները՝ քաղաքապետարանի դեմ», հավաքել բոլոր փաստաթղթերը, որոնք շատ են ու ոչ մի խնդիր չկա:

Առաջի հերթին, պետք է խոսել միայն իրավական դաշտում եւ խախտված օրենքների մասին, բոլոր քննարկումները, թե արդյոք կարեւոր հուշարձան էր թե չէ՝ վտանգավոր են:

Եւ համարում եմ, որ քանի որ պաշտոնյաները փաստացի թույլ են տվել անօրինական շինարարություն եւ հուշարձանի ավիրում, այսինքն՝ չեն կատարել իրենց ուղղակի պարտականությունները, հենց իրենք իրենց գրպանից պետք է հատուցեն նաեւ սեփականատիրոջ վնասները, որոնք կառաջանան սեփականության ձեւը փոխելուց եւ ապամոնտաժելուց: Իսկ հետո իրանք եթե կարողանան այդ գումարները դատարանի միջոցով ստանալ Լֆիկից՝ իրանց գործն է:

Նաեւ քանդելու մասին. Ես չեմ գտնում որ դա իրատեսական է: Հուշարձանը արդեն անվերադարձ փչացել է, վերականգնելը գրեթե անհնար է, պրակտիկապես դա անիրական նպատակ է, որը իսկզբանե դատապարտված է ձախողման: Միակ «օգուտը» որը կարող ենք ակնկալել՝ լուրջ պատիժն է, որը ես անձամբ համարում եմ հնարավոր է կազմակերպել, եթե լինել հետըեւողական եւ ուժերը չծախսել ապարդյուն: Այսքանը»:

Նախորդող`
Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 1
Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 2

Քաղաքաշինության նախարարության ներկայացուցիչ. Փակ շուկան պետք է մնա իր նախնական տեսքով
Քաղաքապետարանի ներկայացուցիչ. Մինչ այժմ Փակ շուկայի վերգետնյա հատվածում շինարարություն իրականացնելու նախագիծ ներկայացված չէ

Ճարտարապետները դիմել են Տարոն Մարգարյանին` «Կենտրոնական ծածկած շուկայի սեփականատիրոջ նկատմամբ հարուցել դատական գործ»
Մշակույթի նախարարություն. Ապամոնտաժել Փակ շուկայի նորակառույց ծավալի երկաթբետոնյա հիմնական հատվածն ընդունելի ծավալով